ഗോസിപ്പ്

അവർ പറയുന്നു
ഞാനൊരു കാമുകനാണെന്ന്,
ഞാൻ പറയുന്നു അല്ലെന്ന്!

പ്രിയമുള്ളവരേ..

കാമുകനാവുകയെന്നാൽ,
ചുഴലിക്കാറ്റിനെ
ഹൃദയംകൊണ്ട് പിടിച്ചു നിർത്താൻ
കഴിവുണ്ടാവുക എന്നാണ്

തിരമാലകളെ, അവയുടെ സൗമ്യതയിൽ നിന്ന്
രൗദ്രത യിലേക്ക് പറഞ്ഞയക്കാൻ
മന:ശക്തി യുണ്ടാവുക എന്നാണ്

കാമുകനാവുകയെന്നാൽ,
നെല്ലിനെ പതിരാക്കിമാറ്റാനും
വെളുത്ത വെയിലിനെ
പ്രഭാതത്തിലേക്ക് മടക്കിയയക്കാനും
പുഴകളെ മുകിലിലേക്ക് തിരിച്ചൊഴുക്കാനും
ശേഷിയുണ്ടായിരിക്കുക എന്നാണ്

ഭാഗ്യവശാൽ എനിക്കിവയില്ല!

അവർ പറയുന്നു
പ്രണയത്തിന് പ്രചരണം വേണ്ടെന്ന്,
ഞാൻ പറയുന്നു വേണമെന്ന്!

സുഹൃത്തുക്കളേ..

ഒരു മഹായുദ്ധം പൊട്ടിപ്പുറപ്പെടാൻ
പ്രചരണം വേണ്ടയോ!?