ചതുരംഗക്കളങ്ങള്‍ പോലുരുക്കു
കമ്പികള്‍ മറ തീര്‍ക്കുമീ
പാരതന്ത്ര്യ ക്കൂട്ടില്‍
ഒരു മൂലയിലിരു കൈയ്യാല്‍ മുഖം
പൊത്തിച്ചടഞ്ഞിരിക്കുന്നു ഞാന്‍..!
പഴയോരെന്‍ തറവാടിന്റെ
മച്ചിന്റെ മൂലയില്‍ ക്ലാവ് പുത-
ച്ചുറങ്ങുന്നോരോട്ടുവിളക്കു പോലെ-
ന്നോര്‍മകള്‍ കൂട്ടിരിക്കുന്നു.!
അശ്രു ധാരകളുറഞ്ഞുപ്പു കല്ലാ-
യൊട്ടി കവിള്‍ ചുവപ്പ്
വികൃതമാക്കിടുന്നു.
വാഴ്വിന്‍ ചപ്പു കൂനകള്‍
മുതുകിലൊരു ഭാര-
മേറ്റീടുന്നു..
'''''''''''''''''''''''''''''''''''''''''''''''''''''''
കൈവിരല്‍ വിടവിലൂടൊരൊറ്റ
മിഴി കൊണ്ടൊരു വേള ഞാനൊ-
രുദൂരമെത്തി നോക്കാനാഞ്ഞതി-
ദൂരമകലെ കണ്ടൊരിത്തിരി നാളമത്
സ്വാതന്ത്ര്യ ച്ചിരാതില്‍
നിന്നുയരുന്ന വെട്ടമോ..!?
'''''''''''''''''''''''''''''''''''''''''''''''''''''
ഓര്‍ത്തില്ല പിന്നൊന്നുമേ
കണ്ട പാതി യെഴുന്നെറ്റോടാ-
നാഞ്ഞതും "വായ്പക്കവധി
കഴിഞ്ഞിരിക്കുന്നുനിന്‍
വേര്‍പ്പ് ഞാനൂറ്റു"മെന്നാഗോള
ഭീമന്റെ ജല്‍പനം കുരുക്കായ്
പാദങ്ങളില്‍ മുറുകുന്നു.
വീണിതൊരുവേള ! കൊട്ടി-
പ്പിടഞ്ഞെഴുന്നേറ്റു വീണ്ടു-
മോടിയാ വെളിച്ചം കണക്കായ്.
''''''''''''''''''''''''''''''''''''''''''''''''''''''
ബാണങ്ങളൊത്തിരിയെന്‍
നേര്‍ക്കു ചീറുന്നു
ഹിംസ്ര ജന്തുക്കള്‍ കയര്‍ത്തോ-
ടിയണയുന്നവയ്കിരു
കാലുകളെന്നറിയുന്നതേ
നെഞ്ചകം പിടക്കുന്നു.
മൂകസ്‌മിതമൊരു മുഖം
കാണ വയ്യ
അഭയത്തിനാദിത്ത്യ-
മരുളുന്ന സത്രങ്ങളില്ല
'ഏതു വഴിയി'തിനു മുമ്പാ-
രുമിതു വഴി വന്നതില്ലേ?-യെന്ന
ശങ്കയിലൊന്നു നില്‍ക്കെ
അച്ചിരാതിന്റെ വെട്ടമൊരു നാളമായ്
ആളലായ് കരിമ്പുക ച്ചാര്‍ത്തായ്
മുകിലിന്‍ നീലിമയെ വക്രീകരിച്ചു.!
അപ്പോഴാ പിന്‍വിളി-
യിലാരോ മൊഴിയുന്നു
"പുതിയ 'ബോംബാ' ണതിന്‍
പരീക്ഷണം വിജയിതം".!
'''''''''''''''''''''''''''''''''''''''''''''''
ഇനിയിത്തമോ ഭൂവിലിരു-
കാലി ജന്മമായ്
ഞാനെന്തിനലയുന്നു.!
തീ നാളമേറ്റൊരു മെഴുകാ-
യുരുകിയൊലിച്ചെങ്കി-
ലെങ്കിലീ ജന്മം സുകൃതം..!!
ഹനീഫ്
